சிறைகளில் உள்ள உளவியலாளர் மற்றும் நல அலுவலர் பணியிடங்களை 6 மாதங்களுக்குள் நிரப்ப அரசு முயல வேண்டும் என உயர் நீதிமன்ற மதுரை அமர்வு உத்தரவிட்டுள்ளது.
சிறைகளில் உள்ள கைதிகளின் மனநலனைப் பாதுகாக்கும் பொருட்டு, காலியாக உள்ள உளவியலாளர் பணியிடங்களை உடனடியாக நிரப்ப வேண்டியது மிகவும் அவசியமானது என்று சென்னை உயர் நீதிமன்ற மதுரை அமர்வு வலியுறுத்தியுள்ளது. சிறைத்துறை தலைமையகத்தில் சீர்திருத்தப் பணிகளுக்கான கண்காணிப்பாளர், பயிற்சி மற்றும் நவீனமயமாக்கலுக்கான கண்காணிப்பாளர் உள்ளிட்ட முக்கிய பணியிடங்களை நிரப்பக் கோரி நீதிமன்றத்தில் வழக்கு ஒன்று தொடரப்பட்டது. இந்த வழக்கினை விசாரித்த உயர் நீதிமன்ற மதுரை அமர்வு தற்போது ஒரு முக்கிய உத்தரவைப் பிறப்பித்துள்ளது.
சிறைச்சாலையில் அடைக்கப்பட்டிருக்கும் கைதிகள் பலர் கடுமையான மனப்போராட்டம், குடும்பக் கவலை மற்றும் பல்வேறு மனப் பிரச்சினைகளால் அவதிப்பட்டு வருகின்றனர். இத்தகைய சூழலில், சிறைகளில் உளவியலாளர் பணியிடங்களை நிரப்புவது மிக முக்கிய தேவையாகும். இது கைதிகளின் மன அழுத்தத்தைக் குறைத்து, அவர்களின் மனப் பிரச்சினைகளுக்குத் தகுந்த தீர்வாக அமையும் என்று நீதிமன்றம் சுட்டிக்காட்டியுள்ளது.
இந்த முக்கியத்துவத்தைக் கருத்தில் கொண்டு, சிறைகளில் காலியாக உள்ள உளவியலாளர் மற்றும் நல அலுவலர் பணியிடங்களை அடுத்த 6 மாதங்களுக்குள் அரசு நிரப்ப வேண்டும் என்று நீதிமன்றம் காலக்கெடு விதித்துள்ளது. மேலும், சிறைத்துறையின் சீர்திருத்தப் பணி, கைதிகளுக்கான பயிற்சிகள் மற்றும் சிறைகளை நவீனமயமாக்குதல் போன்ற பணிகளை மேற்கொள்ளும் கண்காணிப்பாளர் பதவிக்குத் தொழில்நுட்ப அறிவு மிகவும் தேவை என்றும் நீதிமன்றம் குறிப்பிட்டுள்ளது.