பிரம்மாண்டமான சண்டைக் காட்சிகளுக்கு அப்பால், தளபதி விஜய்யின் வசீகரம், இயல்பான குணம் மற்றும் ஆரம்பகால காதல் படங்கள் அவரை உண்மையான ‘பக்கத்து வீட்டுப் பையன்’ என்ற பிம்பத்திற்கு உயர்த்தின.
தமிழகத்தில் ஒரு அரசியல் சக்தியாக விஜய்யின் எழுச்சியும், அவர் முதலமைச்சர் நாற்காலியை அடைந்ததும், மக்கள் மத்தியில் சினிமாவுக்கு இருக்கும் நீங்கா செல்வாக்கை திட்டவட்டமாக நிரூபித்துள்ளது. அவர் முற்றிலும் ஒரு உள்முக சிந்தனையாளராக (introvert) இருந்தபோதிலும், மற்ற எவரையும் விட மக்களின் இதயங்களை வென்றார். 1977-ல் எம்.ஜி. ராமச்சந்திரன் (எம்ஜிஆர்) பெற்ற வெற்றியை விடவும் பெரிய வெற்றியை 2026 தமிழக சட்டமன்றத் தேர்தலில் அவர் பதிவு செய்தார்.
அவரது திரைப்படங்களின் ஆடியோ வெளியீட்டு விழாக்கள் மட்டுமே அவரது ரசிகர்கள் அவரைப் பொதுவெளியில் காண்பதற்கான ஒரே வாய்ப்பாக இருந்தன (குறிப்பாக அவரது திரைப்பயணத்தின் இறுதிக்கட்டத்தில்). இருப்பினும், மக்கள் அவர் மீது காட்டிய அன்பும் நம்பிக்கையும் அளவிட முடியாதது. அவர் தமிழகத்தையே தனக்குத் தரும்படி கேட்டபோது, அரசியல் அல்லது நிர்வாகத்தில் அவருக்கு முந்தைய அனுபவம் ஏதும் இல்லை என்றாலும், அவர் அதை நன்றாகப் பார்த்துக் கொள்வார் என்ற ஆச்சரியமான நம்பிக்கையுடன் மக்கள் அவருக்குப் பரிசாக அளித்தனர்.
எனவே, அவரது திரைப்படங்கள் அவர்கள் மீது பெரும் தாக்கத்தை ஏற்படுத்தின என்பதில் சந்தேகமில்லை. அது இந்த நடிகரின் ‘தளபதி’யாக உருவெடுத்த பிறகு தொடங்கியதல்ல. இது அவரது ஆரம்பகால வாழ்க்கையிலேயே மக்கள் அவர் மீது கொண்ட ஈர்ப்புடன் தொடங்கியது, பல ஆண்டுகளாகப் பனிப்பந்து போலத் திரண்டு, இறுதியில் இன்று நாம் காண்பதாக மாறியுள்ளது.
விஜய்க்கு மக்களின் இதயங்களில் ஒரு தனித்துவமான இடத்தைப் பெற்றுத் தந்தது எளியோருக்கும் துயரப்படுபவர்களுக்கும் “ரட்சகனாக” அவர் நடித்த கேரக்டர்கள் மட்டுமல்ல. அவரது திரைப்பயணத்தின் ஆரம்பக் கட்டத்தில் அவர் நடித்த இலகுவான காதல் திரைப்படங்களும் மக்கள் அவரை நேசிப்பதில் முக்கியப் பங்கு வகித்தன. இன்னும் துல்லியமாகக் கூறினால், அவை மக்களின் இதயங்களுக்கான அவரது நுழைவாயிலாக அமைந்தன. “உங்கள் குடும்பத்தில் ஒரு நபர், உங்கள் மகன், உங்கள் அண்ணன், அல்லது உங்கள் தம்பி” என்று அவரே கூறுவது போல, விஜய் தன்னை ஒரு பக்கத்து வீட்டுப் பையனாக நிலைநிறுத்திக் கொள்ள அந்த படங்கள் உதவின.
ஒரு வகையில், விஜய்யின் உடல் மொழி மற்றும் முகபாவனைகளில் இருந்த குழந்தைத்தனமான கள்ளமின்மையால், யாராலும் புறக்கணிக்க முடியாத ஒரு அன்பானப் பிள்ளையாக ரசிகர்களின் இதயங்களில் அவர் இடம் பிடித்தார் என்று கூறலாம். பெரும்பாலான நடிகர்கள் இத்தகைய கேரக்டர்களில் காதலை வெளிப்படுத்துவதில் மட்டுமே அதிக கவனம் செலுத்தியிருப்பார்கள், ஆனால் விஜய் தெரிந்தே அல்லது தெரியாமலோ தனது நடத்தையில் ஒரு வசீகரமான வியப்பை உட்புகுத்தினார். இது அவரைப் போன்ற காதல் துணையை விரும்பிய அன்றைய இளைஞர்களை மட்டுமல்லாமல், தங்கள் வாழ்க்கையில் அத்தகைய அன்பானக் குழந்தைகள் இருக்க வேண்டும் என்று விரும்பிய பிற வயதினரையும் கவர்ந்தது.
‘கோபக்கார வாலிபன்’ முதல் காதல் நாயகன் வரை
விஜய் தனது தந்தை எஸ்.ஏ. சந்திரசேகர் இயக்கத்தில், தாய் ஷோபா சந்திரசேகர் தயாரிப்பில் வெளிவந்த நாளைய தீர்ப்பு (1992) திரைப்படத்தின் மூலம் கதாநாயகனாக அறிமுகமானார். அந்த நேரத்தில் தென்னிந்தியாவில் “கோபக்கார வாலிபன்” பாணி இன்னும் பிரபலமாக இருந்ததாலும், அதற்குச் சற்று முன்பு ராம் கோபால் வர்மாவின் இயக்கத்தில் நாகார்ஜுனா நடித்த சிவா (1989) திரைப்படம் பெற்ற பரவலானப் பாராட்டுகளாலும், நாளைய தீர்ப்பு திரைப்படமும் தன்னைச் சுற்றியுள்ள அநீதிகளுக்கு எதிராகப் போராடும் ஒரு நாயகனாக விஜயை சித்தரித்தது.
இருப்பினும், ஏற்கனவே அத்தகைய கேரக்டர்களை செய்யக்கூடிய பல நடிகர்கள் இருந்ததால், விஜய்யால் பெரிய தாக்கத்தை ஏற்படுத்த முடியவில்லை, திரைப்படமும் சோபிக்கவில்லை.ஆனால், காதல் தான் தனது பலம் என்பதை விஜய் புரிந்து கொள்ள அதிக காலம் எடுக்கவில்லை. இருப்பினும், அந்த சகாப்தத்தின் பெரும்பாலான இந்தியத் திரைப்படங்கள் பல வகைகளை ஒன்றாகக் கலந்து, ஒவ்வொரு படைப்பும் பார்வையாளர்களுக்கு ஒரு முழுமையான அனுபவத்தை வழங்குவதோடு, முடிந்தவரை பல உணர்ச்சிகளைத் தூண்டுவதையும் உறுதி செய்ததால், அவரது திரைப்படங்கள் வெறும் காதல் கதைகளாக மட்டும் இருக்கவில்லை. அவர் திரையில் காதல் செய்தார், நடனமாடினார், சண்டையிட்டார், அழுதார், சிரித்தார்.
விஜய்யின் ‘சாக்லேட்-பாய்’ சகாப்தம்
அவருக்கு இருந்த மிகப்பெரிய நன்மைகளில் ஒன்று, ரஜினிகாந்த், கமல்ஹாசன், விஜயகாந்த் மற்றும் சத்யராஜ் போன்ற நட்சத்திரங்கள் ஏற்கனவே தங்களது 40-களில் இருந்ததால், அவர்களால் இனி “சாக்லேட்-பாய்” கேரக்டர்களில் நடிக்க முடியாது என்பதாகும். அஜித் குமார், பிரசாந்த் தியாகராஜன் போன்ற இளம் நடிகர்கள் பலத்த போட்டியாளர்களாக இருந்தபோதிலும், அவர்கள் விஜய்யைப் போல அனைத்துத் துறைகளிலும் வல்லவர்களாக (all-rounders) இல்லை. விஜய் எல்லாவற்றிலும் சராசரியாக இருந்தபோதிலும், அவர் தனது சமகாலத்தவர்களைப் போலல்லாமல் அனைத்து கலைகளையும் அறிந்தவராக இருந்தார், இது குடும்ப ஆடியன்ஸ் மத்தியில் அவருக்கு ஒரு வலுவான ரசிகர் பட்டாளத்தை உருவாக்க உதவியது.