தமிழ்நாடு உள்ளிட்ட இந்தியாவின் தென்பகுதி மாநிலங்களில் உள்ள தொழிலதிபர்கள் மற்றும் முதலீட்டாளர்கள் இலங்கையில் முதலீடு செய்ய முன்வர வேண்டும் என்று அவர் அழைப்பு விடுத்தார்.
திருச்சியில் நடைபெற்ற பல்வேறு நிகழ்ச்சிகளில் பங்கேற்பதற்காக வந்திருந்த ஸ்ரீலங்கா முஸ்லிம் காங்கிரஸ் தலைவரும், கண்டி மாவட்ட நாடாளுமன்ற உறுப்பினருமான ரவூப் ஹக்கீம், இன்று திருச்சி விமான நிலையத்தில் செய்தியாளர்களைச் சந்தித்து தமிழக அரசியல் மாற்றம் முதல் இலங்கையின் பொருளாதார நெருக்கடி வரை பல்வேறு முக்கிய விஷயங்கள் குறித்து கருத்து தெரிவித்தார்.
தமிழகத்தில் புதிதாக பதவியேற்றுள்ள அரசை வரவேற்ற அவர், ஜனநாயக அமைப்பில் ஆட்சிமாற்றங்கள் இயல்பானவை மட்டுமல்ல, அவை சமூக முன்னேற்றத்திற்கும் நிர்வாக திறன் மேம்பாட்டிற்கும் வழிவகுக்கும் என்றும் கூறினார். இதற்கு முன்பு ஆட்சியில் இல்லாத ஒரு புதிய அரசியல் அணி மக்களின் ஆதரவுடன் மிகப்பெரிய வெற்றியைப் பெற்று ஆட்சிப் பொறுப்பேற்றிருப்பது ஜனநாயகத்தின் வலிமையை வெளிப்படுத்துவதாகவும் அவர் குறிப்பிட்டார். முந்தைய ஆட்சியாளர்கள் உருவாக்கிய வளர்ச்சி அடித்தளத்தைத் தொடர்ந்து, புதிய அரசு தமிழகத்தை மேலும் உயர்ந்த முன்னேற்றப் பாதைக்கு அழைத்துச் செல்லும் என்ற நம்பிக்கை இருப்பதாகவும் தெரிவித்தார்.
இந்தியா – இலங்கை இடையிலான மீனவர் பிரச்சினை குறித்து பேசிய அவர், இது சட்டரீதியான பிரச்சினையாக மட்டுமல்லாமல், மனிதாபிமானம் மற்றும் வாழ்வாதாரத்துடன் தொடர்புடைய பிரச்சினையாகவும் பார்க்கப்பட வேண்டும் என்றார். இரு நாடுகளின் மீனவர்களும் பல தலைமுறைகளாக கடலை நம்பி வாழ்ந்து வருவதால், பரஸ்பர புரிதல் மற்றும் விட்டுக்கொடுப்புகளின் அடிப்படையில் சுமுகமான தீர்வு காணப்பட வேண்டும் என்றார்.
இந்த விவகாரத்தில் தமிழ்நாடு அரசு, இந்திய மத்திய அரசு, இலங்கை அரசு மற்றும் யாழ்ப்பாண மீனவர் சமூக பிரதிநிதிகள் இணைந்து பேச்சுவார்த்தைகளை தீவிரப்படுத்த வேண்டும் என்றும் அவர் வலியுறுத்தினார். இலங்கை மீன்வளத்துறை அமைச்சர் ஏற்கனவே தமிழகத்திற்கு வந்து அரசியல் தலைவர்களுடனும் மத்திய அரசு அதிகாரிகளுடனும் ஆலோசனை நடத்தியுள்ளதாகவும் தெரிவித்தார். இது இரு நாடுகளின் ராஜதந்திர உறவுகளோடு தொடர்புடைய விஷயம் என்பதால், நீதிமன்றங்களில் நிலுவையில் உள்ள வழக்குகள் குறித்து தற்போது கருத்து தெரிவிப்பது பொருத்தமல்ல என்றும் கூறினார்.
இலங்கையின் தற்போதைய பொருளாதார சூழ்நிலை குறித்து பேசிய ரவூப் ஹக்கீம், விலைவாசி உயர்வு இன்னும் கட்டுக்குள் வராத நிலையில் இருப்பதாகவும், அத்தியாவசியப் பொருட்களின் விலைகள் தொடர்ந்து உயர்ந்து வருவதால் பொதுமக்கள் கடுமையான சிரமங்களை எதிர்கொண்டு வருவதாகவும் தெரிவித்தார். உலகளாவிய அரசியல் பதற்றங்கள், போர் சூழ்நிலைகள் மற்றும் ஏற்கனவே ஏற்பட்டிருந்த பொருளாதார வீழ்ச்சி ஆகியவை இலங்கையின் நெருக்கடியை மேலும் தீவிரப்படுத்தியுள்ளதாகவும் அவர் கூறினார்.
மோதல் தவிர்ப்பு ஒப்பந்தம் தொடர்பான பேச்சுவார்த்தைகள் நிறைவடைய இன்னும் சுமார் 60 நாட்கள் உள்ளதாகவும், அது வெற்றிகரமாக முடிந்தாலும் அதன் பொருளாதார பலன்கள் மக்களுக்கு கிடைக்க மேலும் இரண்டு முதல் மூன்று மாதங்கள் ஆகும் என பொருளாதார நிபுணர்கள் மதிப்பிட்டுள்ளதாகவும் தெரிவித்தார்.
சர்வதேச நாணய மாற்று சந்தையில் இலங்கை ரூபாயின் மதிப்பு வீழ்ச்சியடைந்துள்ளதால், இறக்குமதி துறை கடுமையாக பாதிக்கப்பட்டுள்ளதாக அவர் கூறினார். குறிப்பாக கச்சா எண்ணெய், உரங்கள் மற்றும் பிற அத்தியாவசிய பொருட்களை இறக்குமதி செய்வதில் பெரும் சிக்கல்கள் ஏற்பட்டுள்ளதாகவும் தெரிவித்தார்.