ஒரு ரூபாய் போதும், மீதி அப்புறம்… லாபத்தில் பங்கு யோசனையை ரஜினிகாந்த் உருவாக்கியது எப்படி?

தற்போது மீண்டும் நெல்சன் திலீப்குமார் இயக்கத்தில் உருவாகும் ‘ஜெயிலர் 2’, வரும் மாதங்களில் அதிகம் எதிர்பார்க்கப்படும் தமிழ் வெளியீடுகளில் ஒன்றாக உள்ளது.

தமிழ் சினிமாவில் முன்னணி நடிகரான ரஜினிகாநத், 5 தசாப்தங்களுக்கும் மேலான தனது திரைப்பயணத்தில், இந்திய சினிமாவின் மிகவும் அங்கீகரிக்கப்பட்ட முகங்களில் ஒருவராக இருந்து வருகிறார். அவரது ரசிகர் பட்டாளம் இந்தியா மட்டும் இல்லாமல் உலகளவிலும் பரவியுள்ளது. அவரது திரைப்படங்கள் தமிழ்நாடு, ஆந்திரப் பிரதேசம், கர்நாடகா மற்றும் வெளிநாடுகளில் தொடர்ந்து பிரம்மாண்டமான வசூலை குவித்து வருகிறது. 

அதே சமயம் ஒரு திரைப்படத்தை தொடங்குவதற்கு அவரது பெயர் ஒன்றே போதுமானதாகக் கருதப்படுகிறது. திரையுலகத் தரவு ஆய்வாளரான ‘சாக்னில்க்’ (Sacnilk) தகவல்படி, ரஜினிகாந்தின் சமீபத்திய சாதனைகளில், நெல்சன் திலீப்குமார் இயக்கத்தில் வெளியான ஜெயிலர் (2023) திரைப்படம் உலகளவில் ரூ604.50 கோடி வசூலித்தது. இது எக்காலத்திலும் அதிக வசூல் செய்த தென்னிந்தியத் திரைப்படங்களில் 10-வது இடத்தையும், உலகளாவிய பாக்ஸ் ஆபீஸில் 3-வது பெரிய தமிழ்ப் படமாகவும் இடம்பிடித்தது.

ஷங்கர் இயக்கத்தில் வெளியான 2.0 (2018) திரைப்படம், உலகளவில் சுமார் ரூ691 கோடி வசூலித்து, வரலாற்றிலேயே அதிக வசூல் செய்த தமிழ்ப் படமாக இன்றும் நீடிக்கிறது. லோகேஷ் கனகராஜ் இயக்கத்தில் கடந்த ஆண்டு வெளியான கூலி திரைப்படம், உலகளவில் ரூ500 கோடி வசூலைக் கடந்தது. தற்போது மீண்டும் நெல்சன் திலீப்குமார் இயக்கத்தில் உருவாகும் ‘ஜெயிலர் 2’, வரும் மாதங்களில் அதிகம் எதிர்பார்க்கப்படும் தமிழ் வெளியீடுகளில் ஒன்றாக உள்ளது.

இத்தகைய பெரும் வரவேற்பைப் பெற்ற ஒரு நடிகர், திரையுலகிலேயே ஒரு படம் தொடங்குவதற்கு முன், அதிக அட்வான்ஸ் பணம் பெறுவார் என்று எதிர்பார்ப்பது நியாயமானது. இருப்பினும், தயாரிப்பாளர் ஜி.தனஞ்செயன் தற்போது தெரிவித்துள்ள தகவல், பண விஷயத்தில் ரஜினிகாந்த் கடைபிடிக்கும் அணுகுமுறை முற்றிலும் வேறுபட்டது என்பதை உணர்த்துகிறது. 

‘சினிமா ஸ்ட்ரேட்டஜிஸ்ட்’ (Cinema Strategist) நிகழ்ச்சியில் பேசிய தனஞ்செயன், ரஜினிகாந்த் ஒருமுறை ஒரு படத்திற்காக வெறும் 1 ரூபாயை மட்டுமே முன்பணமாகப் பெற ஒப்புக்கொண்டதாகவும், அதற்குப் பின்னால் உத்தரவாதமான சம்பளம் எதுவும் இல்லை என்றும் வெளிப்படுத்தினார். படம் வெளியான பிறகே அவரது சம்பளம் தீர்மானிக்கப்படும் என்றும், அது படத்தின் வணிக ரீதியான வெற்றியைப் பொறுத்தே அமையும் என்றும் கூறப்பட்டது.

ஒரு படம் ஒப்பந்தம் செய்யப்படும்போது, வெறும் ஒரு ரூபாய் கொடுத்தாலே போதும். பிறகு, படம் வெளியாகும் போது மீதமுள்ள தொகையைக் கொடுத்துக்கொள்ளலாம்.” என ரஜினிகாந்த் கூறியதாக தனஞ்செயன் விளக்கினார். படம் லாபம் ஈட்டினால், ரஜினிகாந்த் அதிக சம்பளம் பெறுவார். ஒருவேளை படம் எதிர்பார்த்தபடி ஓடாவிட்டால், அவர் குறைவான தொகையையே பெறுவார். “வணிகம் வளர்ந்தால் நாம் அதிகம் கொடுக்க வேண்டும், அது குறைந்தால் குறைவாகக் கொடுப்போம். இதுதான் வணிக முறை,” என்று தனஞ்செயன் கூறினார்.

ரஜினிகாந்தின் இந்த முடிவு ஏதோ ஒரு தந்திரமான பேச்சுவார்த்தை அல்ல, மாறாக ஒரு திரைப்படம் தோல்வியடையும் போது தயாரிப்பாளர்கள் மட்டுமே மொத்த நஷ்டத்தையும் சுமக்கக் கூடாது என்ற அவரது உயரிய எண்ணமாகும். தயாரிப்பாளர்களுக்கு எந்த வகையிலும் பாதிப்பு ஏற்படக்கூடாது என்பதில் ரஜினி சார் உறுதியாக இருந்தார்,” என்று அவர் கூறியுள்ளார்.

இத்தகைய சம்பவங்களில் ரஜினிகாந்த் கூறிய கருத்துக்களை மேற்கோள் காட்டிய தனஞ்செயன், “ரஜினிகாந்த் ஒரு படத்தை முடித்துவிட்டு வந்து, ‘இன்றைய என் சம்பளம் என்ன? அதைக் கொடுத்தால் நான் கிளம்புவேன்’ என்று கேட்கும்போது, அந்தத் தயாரிப்பாளர் பயப்படவே மாட்டார்,” என்று நினைவுகூர்ந்தார்.